പ്ലാച്ചിമടയിലെ ഭൂജലശോഷണത്തിനു കാരണമെന്ത്? കൊക്കകോള കമ്പനി? ആവാം, ആയിരിക്കാം. എന്നാല് ഏതാണ്ട് തുല്യ ഉത്തരവാദിത്വമാണത്രെ പ്ലാച്ചിമടയിലെ കര്ഷകര്ക്കും. Coco Cola Factory gate
പ്ലാച്ചിമടയിലെ ഭൂജലശോഷണത്തിനു കാരണമെന്ത്? കൊക്കകോള കമ്പനി? ആവാം, ആയിരിക്കാം. എന്നാല് ഏതാണ്ട് തുല്യ ഉത്തരവാദിത്വമാണത്രെ പ്ലാച്ചിമടയിലെ കര്ഷകര്ക്കും. അവരില് നല്ലൊരു വിഭാഗം നെല്കൃഷിയും പരുത്തിയും നിലക്കടലയും ഉപേക്ഷിച്ച് തെങ്ങുകൃഷി തുടങ്ങി. തെങ്ങിന്തൈകള് നനയ്ക്കാന് അമിതമായി ജലമുപയോഗിച്ചു. തേങ്ങയ്ക്കു വില കുറഞ്ഞപ്പോള് തെങ്ങുകള് ചെത്താന് കൊടുത്തു. കൂടുതല് കള്ളു കിട്ടാന് കൂടുതല് നനച്ചു. അതിനായി കുഴല്ക്കിണറുകള് കുഴിച്ചു. ഇതാണ് പ്ലാച്ചിമടയിലെ ഭൂജലശോഷണത്തിന്റെ ഒരു മുഖ്യകാരണം. തിരുവനന്തപുരം ആസ്ഥാനമായുള്ള സെന്റര് ഫോര് ഡെവലപ്മെന്റ് സ്റ്റഡീസിന്റെ (സി.ഡി.എസ്.) ഡയറക്ടര് ഡോ. കെ. നാരായണന്നായര്, സി.ഡി.എസ്സിലെ തന്നെ ഡോ. ആന്റണി ടോപാള്, പ്രൊഫ. വിനീതമേനോന് എന്നിവര് ചേര്ന്നു രചിച്ച 'വാട്ടര് ഇന്സെക്യൂരിറ്റി, ഇന്സ്റ്റിറ്റിയൂഷന്സ് ആന്ഡ് ലൈവ്ലിഹുഡ് ഡൈനാമിക്സ് - എ സ്റ്റഡി ഇന് പ്ലാച്ചിമട' എന്ന പുസ്തകത്തിലാണ് ഈ കണ്ടുപിടിത്തം.
ജലത്തെ കേന്ദ്രീകരിച്ചുകൊണ്ടുള്ള തര്ക്കങ്ങളും യുദ്ധങ്ങളും വ്യാപകവും തീവ്രവുമായിക്കൊണ്ടിരിക്കുന്ന ഈ കാലഘട്ടത്തില് അവയുടെ സ്വഭാവവും മൂലകാരണങ്ങളും ഈ യുദ്ധങ്ങള് ഗ്രാമീണ ഉപജീവനമാര്ഗങ്ങളെ എങ്ങനെ ബാധിക്കുന്നു എന്നതും വേണ്ടത്ര പഠനവിധേയമാക്കിയിട്ടില്ലെന്നും പ്ലാച്ചിമടയില് നടത്തിയ ഈ പഠനം ആ ദിശയിലുള്ള ഒരു ശ്രമമാണെന്നും ഗ്രന്ഥകര്ത്താക്കള് ആമുഖത്തില് വ്യക്തമാക്കുന്നുണ്ട്. നാലു വര്ഷമോ അതിലേറെയോ നീണ്ട പഠന/നിരീക്ഷണങ്ങളില്നിന്ന് ഉരുത്തിരിഞ്ഞുവന്ന നിഗമനങ്ങളാണ് ഈ പുസ്തകത്തില്. പഞ്ചായത്ത്, ഭൂജലവകുപ്പ്, മലിനീകരണ നിയന്ത്രണബോര്ഡ്, സംസ്ഥാന സര്ക്കാര്, കോടതികള് തുടങ്ങിയ പൊതുസ്ഥാപനങ്ങള് പ്ലാച്ചിമടയില് വഹിച്ച പങ്ക് പഠനവിധേയമാക്കുന്നുണ്ട്. അന്നത്തെ ഇടതുപക്ഷസര്ക്കാര് കൊക്കകോളയെ പ്ലാച്ചിമടയിലേക്കു ക്ഷണിച്ചതു മുതല് കമ്പനി പൂട്ടിയതും കമ്പനിക്ക് അനുകൂലമായി കേരള ഹൈക്കോടതി വിധി വന്നതും അതിനെതിരെ സുപ്രീംകോടതിയില് സര്ക്കാര് അപ്പീല് കൊടുത്തതും കൊക്കകോള വിരുദ്ധസമരസമിതിയുടെ നേതൃത്വത്തില് നടന്ന സമരവും മാധ്യമങ്ങളുടെ പങ്കും ബി.ബി.സി.യുടെ ആഭിമുഖ്യത്തില് ഖരമാലിന്യങ്ങളില് മാരകവിഷങ്ങളുടെ സാന്നിധ്യം കണ്ടുപിടിച്ചതും 73-74 ഭരണഘടനാഭേദഗതികള് വഴി പഞ്ചായത്തിനു ലഭ്യമായ അധികാരങ്ങളും ഭൂജലത്തിന്റെ ഉടമയാര് എന്ന നിര്ണായകചോദ്യവും ഗ്രന്ഥകര്ത്താക്കള് വിശകലനം ചെയ്യുന്നുണ്ട്.
സെന്റര് ഫോര് ഡെവലപ്മെന്റ് സ്റ്റഡീസ് എന്നാല് നിഗമനങ്ങളിലേക്കും ശുപാര്ശകളിലേക്കും എത്തുമ്പോഴാണ് ശരികേടുകള് പൊങ്ങിവരുന്നത്. പ്ലാച്ചിമടയിലെ ജലശോഷണത്തിന് ഒന്നിലേറെ കാരണങ്ങളുണ്ടെന്ന് ഈ പഠനം പറയുന്നു. പഠന വിധേയമാക്കിയ പ്രദേശത്ത് തുടര്ച്ചയായുള്ള വര്ഷങ്ങളില് മഴയുടെ ലഭ്യതയ്ക്കുണ്ടായ കുറവ്, പറമ്പിക്കുളം ആളിയാര് പദ്ധതിയുടെ പരാജയം, കുഴല്ക്കിണറുകളുടെ എണ്ണത്തിലുണ്ടായ വര്ധനയും അവയുടെ ആഴം കൂട്ടലും, കുളങ്ങള്വഴി പരമ്പരാഗതമായി നിലനിന്നിരുന്ന ജലസേചനത്തിന്റെ അപചയം എന്നിവയാണ് പ്രതിസന്ധിയുടെ പ്രധാന കാരണങ്ങള്. ഈ പ്രശ്നങ്ങളുടെയൊപ്പം കൊക്കകോള കമ്പനി ദിവസവും അഞ്ചു ലക്ഷം ലിറ്റര് ഭൂജലം എടുക്കുകകൂടി ചെയ്തത് ജലക്ഷാമത്തെ രൂക്ഷമാക്കി.
പെരുമാട്ടി പഞ്ചായത്ത് സ്ഥിതിചെയ്യുന്ന ചിറ്റൂര് ബ്ലോക്കില് കാലാകാലങ്ങളായിത്തന്നെ കേരളത്തില് ആകെ ലഭിക്കുന്ന ശരാശരി മഴയില്നിന്ന് വളരെക്കുറവു മഴയേ ലഭിക്കാറുള്ളൂ. കേരളത്തില് ആകെ മഴ കുറയുന്ന വര്ഷങ്ങളില് ചിറ്റൂരിലും പെരുമാട്ടിയിലും ആനുപാതികമായി മഴ കുറയുക എന്നത് സ്വാഭാവികം മാത്രം. തുടര്ച്ചയായി മൂന്നുവര്ഷംപെരുമാട്ടിയില് മഴ കുറവായതാണ് ജലശോഷണത്തിന് കാരണമെന്ന് 2005-ല്തന്നെ കൊക്കകോള അവരുടെ വെബ്സൈറ്റില് കൊട്ടിഗ്ഘോഷിച്ചിരുന്നു. ഈ നിഗമനത്തില് എത്താന്ഇത്തരമൊരു ഗവേഷണത്തിന്റെ ആവശ്യമുണ്ടായിരുന്നില്ല. അവരുടെ നിഗമനംകിറുകൃത്യമാണ് എന്ന് സാക്ഷ്യപത്രം നല്കലായിരുന്നോ ഗവേഷണലക്ഷ്യം?
പറമ്പിക്കുളം-ആളിയാര് പദ്ധതിയില്നിന്ന് ഉടമ്പടിപ്രകാരം തമിഴ്നാട്ടില്നിന്നു ജലം ലഭിക്കാത്തത് പാലക്കാട് ജില്ലയിലെ അനേകം പഞ്ചായത്തുകളെ ബാധിക്കുന്ന കാര്യമാണ്. തലക്കുളങ്ങളില്നിന്നുള്ള ജലസേചനം പഴങ്കഥയായതും പെരുമാട്ടിയില് മാത്രമല്ല. ഇനിയുള്ളത് കുഴല്ക്കിണറുകളുടെ എണ്ണത്തിലുണ്ടായ വര്ധനയാണ്. വളരെ ശാസ്ര്തീയമായി പഠനം നടത്തുന്ന സി.ഡി.എസ്സുകാര്ക്ക് പക്ഷേ, അവര് പഠനവിധേയമാക്കിയ പഞ്ചായത്തിലെ എട്ടും ഒന്പതും വാര്ഡുകളില് എത്ര കുഴല്ക്കിണറുകള് ഉണ്ടായിരുന്നു എന്നറിയില്ല. ഇപ്പോള്, അല്ലെങ്കില് അവര് സാമ്പിള് ശേഖരിച്ച 2004-ല് എത്ര കുഴല്ക്കിണറുകള് ഉണ്ടെന്ന് അറിയില്ല. അതു 'ലഭ്യമല്ല' എന്ന് യാതൊരു സങ്കോചവുമില്ലാതെ പറയുന്ന അവര്ക്ക് കുഴല്ക്കിണറുകളുടെ എണ്ണവും ആഴവും വര്ധിച്ചു എന്നു തറപ്പിച്ചുപറയാന് യാതൊരു മടിയുമില്ല. (കൊക്കകോള കമ്പനിക്ക് പക്ഷേ, ഇതു തിട്ടമുണ്ട്. 150 എന്ന് അവര് വെബ്സൈറ്റില് പറയുന്നു. തങ്ങള്ക്ക് കേവലം ആറേ ഉള്ളൂവെന്നും കര്ഷകരുടെ കുഴല്ക്കിണറുകളാണ് തങ്ങളുടേതല്ല ജലശോഷണത്തിനു കാരണമെന്നും അവരും തറപ്പിച്ചു പറയുന്നു.)
