ക്രൂരത മൃഗങ്ങളോടോ മനുഷ്യരോടോ?

രാഷ്ട്രീയം	— രാഷ്ട്രീയനിരീക്ഷകൻ		29 മെയ് 2017.

Error: <seo> tag must contain at least one non-empty attribute.

ചിത്രത്തിന് കടപ്പാട് : Telegraph.co.uk

ആരും നോക്കാനില്ലാതെ തെരുവുകളിലൂടെ അലഞ്ഞുതിരിഞ്ഞ് ഓടവെള്ളം നക്കിക്കുടിച്ചും പ്ലാസ്റ്റിക് തിന്നും എല്ലും തോലുമായി നരകിച്ചു ചാവുന്നതോ കശാപ്പുചെയ്യപ്പെടുന്നതോ, ഏതാണു ക്രൂരത? രണ്ടാമത്തേതാണ് എന്നു സംശയമില്ല കേന്ദ്ര സർക്കാരിന്.

രാജ്യത്തെ എഴുപതു ശതമാനം ജനങ്ങളുടെയെങ്കിലും ഭക്ഷണരീതികളെ ബാധിക്കുന്ന ഒരു നടപടി യാതൊരു തരത്തിലുമുള്ള ചർച്ചകളും കൂടാതെ സ്വീകരിക്കാൻ ബി ജെ പി സർക്കാരിനെ പ്രേരിപ്പിച്ചതിനു പിന്നിൽ കന്നുകാലി സ്നേഹവും സസ്യാഹാരികളുടെ മനം കുളിർപ്പിക്കലുമാണെന്ന് ആർക്കും വിശ്വസിക്കാൻ കഴിയില്ല. അങ്ങനെയായിരുന്നെങ്കിൽ നടപ്പിലാക്കാൻ കഴിയുമെന്ന് ഉറപ്പുള്ള നിയമങ്ങളും ചട്ടങ്ങളുമാണ് പ്രാബല്യത്തിലാക്കേണ്ടിയിരുന്നത്. സംസ്ഥാനങ്ങളുടെ അധികാരപരിധിയിലേയ്ക്കുള്ള കടന്നുകയറ്റമാണ് തങ്ങൾ പുറപ്പെടുവിക്കുന്ന വിജ്ഞാപനം എന്ന ഉത്തമബോധ്യത്തോടെ അതുചെയ്യുമ്പോൾ അവരുടെ ഉദ്ദേശവും ലക്ഷ്യവും മറ്റു പലതാണ് എന്ന് നമുക്കുറപ്പിക്കാം.

ഇതിനുമുമ്പും ഇതുപോലെ ഒരു ഇരുട്ടടി കിട്ടിയിട്ടുണ്ട് ഭാരതീയ ജനതയ്ക്ക് : നോട്ട് പിൻ‌വലിക്കൽ. അന്നുരാത്രി ചന്ദ്രൻ ഉദിച്ചു മായുമ്പോഴേയ്ക്കും കാര്യങ്ങൾ ആകെ മാറിമറിഞ്ഞു. എന്നാൽ നിയമവിധേയരായി ജീവിക്കാൻ കഴിയുന്നത്ര ശ്രമിക്കുന്ന ഒരു ജനത ആ ഇരുട്ടടികൊണ്ട കവിൾ ഒന്നു തടവി -എന്തായാലും മറുകവിൾ കാണിച്ചുകൊടുക്കാതെ - കഷ്ടപ്പാടുകൾ സഹിച്ച് അതിനെ തരണം ചെയ്തു. അതായിരുന്നു ആദ്യത്തെ ടെസ്റ്റ് ഡോസ്.

സമഗ്രാധിപത്യത്തിലേയ്ക്കു കുതിക്കാൻ വെമ്പുന്ന ഒരു ഭരണകൂടത്തിന്റെ രണ്ടാമത്തെ ടെസ്റ്റ് ഡോസ് അല്ലേ മൃഗക്ഷേമത്തിന്റെ പേരിലുള്ള ഈ നിയമഭേദഗതി? പൊതുസമൂഹം ഇതിനോട് എങ്ങനെ പ്രതികരിക്കുന്നു എന്നത് അവർ ആകാംക്ഷയോടാവും ഉറ്റുനോക്കുക. 'ഭാവിഭാരത'ത്തിന്റെ അലകും പിടിയും മാറ്റിമറിക്കാൻ രാത്രി വൈകി പുറപ്പെടുവിക്കുന്ന വിജ്ഞാപനങ്ങൾ മതിയാവുമോ എന്ന്‌ അറിയണമല്ലോ.

നോട്ട് നിരോധനം അസംഘടിത തൊഴിൽമേഖലയേയും ചെറുകിടവ്യവസായങ്ങളേയും കർഷകരേയും സാധാരണ ജനങ്ങളെ ആകെയും കഷ്ടത്തിലാക്കിയപ്പോൾ ആ നടപടിയുടെ ഗുണഫലങ്ങൾ ലഭിച്ചത് വിരലിലെണ്ണാവുന്ന മൊബൈൽ വാലറ്റ് കമ്പനികൾക്കും ക്രെഡിറ്റ്കാർഡ് കമ്പനികൾക്കുമായിരുന്നു എന്ന വസ്തുത മറന്നുകൂട. കശാപ്പ് നിരോധനവും അതേപോലെതന്നെ വലിയൊരു ജനവിഭാഗത്തിന്റെ ആഹാരം നഷ്ടപ്പെടുത്തുകയും കന്നുകാലികളെ പരിപാലിക്കുന്ന കർഷക ജനതയെ സാമ്പത്തികമായി അധോഗതിയിലാക്കുകയും ചെയ്യും. മാംസ, തുകൽ, എല്ല് വ്യവസായങ്ങളെ ആശ്രയിച്ച് മൂന്നര കോടിയോളം ജനങ്ങൾ ജീവിക്കുന്നു. ലക്നൗവിലെ തുകൽ ഫാക്ടറികളിൽ മാത്രം 10 ലക്ഷം തൊഴിലാളികൾ പ്രവർത്തിച്ചിരുന്നു. സമൂഹത്തിലെ ഏറ്റവും പിന്നോക്കക്കാരായ വിഭാഗങ്ങൾ കൂടുതലായും ഏർപ്പെടുന്ന ഈ വ്യവസായങ്ങൾ കാലങ്ങളായി അവഗണനയിലാണ്. കശാപ്പ് നിരോധനം അവരുടെ അന്നം മുട്ടിക്കും.

ഇറച്ചി കയറ്റുമതിയിൽ ലോകത്ത് ഒന്നാം സ്ഥാനമാണ് നമുക്കുള്ളത്. ഈ മേഖലയിലെ കുത്തകവൽക്കരണമാണ് സർക്കാരിന്റെ ലക്ഷ്യമെന്നും അവർക്ക് വേണ്ടുന്ന അസംസ്കൃത വസ്തുക്കൾ കുറഞ്ഞ വിലയിൽ തരപ്പെടുത്താനുള്ള നീക്കങ്ങളാണിതെന്നും ആരോപണങ്ങളുണ്ട്. നോട്ട് നിരോധനത്തിന്റെ ലക്ഷ്യം പോലെ? ഇനി ലക്ഷ്യം അതല്ലെങ്കിൽ മറ്റെന്താണ്. അധികാരത്തണലിൽ വിലസുന്ന ഗോസംരക്ഷക സംഘങ്ങളെ നിരോധിക്കണമെന്ന് ആവശ്യപ്പെട്ടുകൊണ്ടുള്ള ഹർജിയിൽ കേന്ദ്രസർക്കാർ ഇനിയും മറുപടിനൽകിയിട്ടില്ല. നിരോധിക്കപ്പെട്ടാൽ ആ സംഘങ്ങളെ തൃപ്തരാക്കാനോ ഈ നീക്കം. നിരോധിച്ചില്ലെങ്കിൽ കൂടുതൽ ശക്തരാക്കാനും?

നിരവധി പരീക്ഷണങ്ങൾ അഭിമുഖീകരിക്കാൻ ഇന്ത്യക്കാർ ഒരുങ്ങേണ്ടിയിരിക്കുന്നു.

Enable comment auto-refresher